Liv Grete Skjelbreid Poirée (f. 7.7.1974)

Skiskyttardronninga vår har lagt ski og børse på hylla etter 2005/06-sesongen og ventar barn nr. 2 ved årsskiftet. Tusen takk for all moro du gav oss som aktiv skiskyttar!

Liv Grete starta karrieren med delt 4. plass i ljosløype-cupen på Holdhus i klasse 5-6 år i 1980. I 1987 var ho suveren på Vestlandet i sin klasse (12-13 år) og vart dobbel vestlandsmeister.

NM:

Sine første NM-gull tok ho alt i 1994 - på stafetten og i lagkonkurransen. I 1997 byra ho å vinna individuelle NM-gull, og seinare er ho blitt ståande som NM-dronninga med heile 13 individuelle gullmedaljer. Liv Grete fekk plass på elitelaget i 1995. Same året tok ho sin første individuelle NM-medalje som senior med sprintsølv, og ho debuterte i verdscupen.

World Cup:

Det store gjennombrotet i verdscupen kom i 1998. 15. januar fekk ho si første pallplassering, då ho vart nummer to på 15 km i Anterselva i Italia. I 1999 tok ho steget heilt til topps i tyske Oberhof. Så langt har det blitt til saman 22 individuelle verdscupsigrar, 15 andreplassar og 9 tredjeplassar. Samanlagt vart ho nr. 2 både i 2000/01 og 2001/02. Ho hadde svangerskapspermisjon 2002/03, og vann verdscupen samanlagt i comeback-sesongen 2003/04. Sesongen 2004/05 var ho mykje sjuk og deltok berre på 15 verdscuprenn, vann fellesstarten i Østersund og vart nr. 22 samanlagt. I den siste sesongen 2005/06 vart ho nr. 12 samanlagt og vann jaktstarten i Ruhpolding.

OL:

Liv Grete har delteke i tre OL. I Nagano i 1998 fekk ho bronsemedalje på stafetten saman med Ann-Elen. I Salt Lake City vart ho den første norske kvinna med individuell OL-medalje i skiskyting, då ho greidde sølv på den innleiande 15-kilometeren. På stafetten vart det også sølv – igjen saman med storesyster. I San Sicario i 2006 var ho nære på heilt til siste skyting på normalen. Likevel flott innsats i ein sesong der jo jobba seg sakte men sikkert oppover: 9 på normalen, 12 sprint, 6 på jaktstarten, 18 på fellesstarten og 5 på stafetten etter ein fantastisk etappe! 

VM:

Liv Grete vart nr. 7 på sprinten allereie i Ruhpolding-VM 1996. Året etter var ho med og vann gull i lag-VM og sølv på VM-stafetten. VM-2000 i Oslo vart Liv Grete sitt meisterskap med dobbelt gull - på sprinten og på fellesstarten. Og dette i ein sesong der ho hadde vore sjuk i lengre tid. Året etter tok ho medalje i alle valørar i Pokljuka og vann jaktstarten. Oberhof-VM 2004 vart Liv og Raphael sitt VM: 4 gull i comeback-året etter mammapermisjonen imponerte oss alle! I Hochfilzen-VM 2005 var ho sett ut av spel på grunn av sjukdom.